ILOILO CITY – Nagdangat sa 3,484 tanan ka mga violator sang minimum health protocol ang narekord sang Iloilo City Police Office (ICPO) sang Marso 14 tubtob 20 sa syudad sang Iloilo.
Sa interview sang Bombo Radyo kay Pol. Col. Uldarico Garbanzos, director sang ICPO, iya ginpahayag nga ang nasambit nga violators ang lunsay ginwarningan kag ginhatagan sang citation ticket ukon multa.
Suno kay Garbanzos, sa tion nga indi mabayaran sang amo nga violators ang multa, mahimo sila nga pasakaan sang nagakaigo nga kaso.
Ginpahayag ni Garbanzos, nga ang kadam-an sa mga violators ang nagikan sa mga merkado sa syudad sang Iloilo sa diin ginadala pa sang mga ginikanan ang ila kabataan nga wala nagasuksok sang face mask kag faceshield.
Lakip man diri suno sa iya ang mga nagahampang sa mga computer kag gaming shop nga nagasininggitan kag wala pa nagasuksok sang face mask ukon faceshield.
Bangud man sa mga kabataan nga ginmultahan sa mga gaming shop suno kay Garbanzos, ginpatuman nila ang curfew for minors sang Marso 16, umpisa las 8:00 sang gab-i tubtob las 4:00 sang kaagahon.
Gin-athag naman ni Garbanzos nga ang 3,484 tanan ka violators ang narekord nagikan sa anom tanan nga mga police station sa syudad sang Iloilo.
Kun pahat-pahaton, 12 diri ang ginmultahan nga wala nagasuksok sang faceshield kag 814 ang ginwarningan.
Nagsaka naman sa 598 ang mga tawo nga ginmultahan nga wala nagasuksok sang facemask sa diin 767 ang ginwarningan.
15 naman ang ginmultahan nga nagbayolar sa physical distancing sa diin nagdangat sa 1,278 tanan ang ginwarningan.
