Itugyan na lamang sang Chairman sang Committee on Games, Amusement and Professional Sports sa Iloilo City Council ang ginpatigayon nga bulang kagab-i sa Rockwell cockpit arena sa Don Esteban Street, La Paz, Iloilo City.
Ini ang kasunod sang paglapas sang amo nga mga manugbulang sa Resolution no. 103 nga ginpagwa sang National Inter-Agency Task Force (IATF).
Nasaad sa amo nga pagsulundan nga suspendihon ang cockfighting kag cockpit operations sa tanan nga lugar sa pungsod lakip na sa mga lugar nga napaidalom sa Modified General Community Quarantine (MGCQ).
Sa interview sang Bombo Radyo kay Iloilo City Councilor Jojo Javellana, iya ginpahayag nga nagapatuman lamang sila sang mando nagikan kay Iloilo City Mayor Jerry Treรฑas gani mas maayo nga bag-o sila maghimo sang tikang, mamangkot sila anay sa alkalde kun ano ang nagadapat nila nga ipatuman natuhoy sa mga manugbulang nga nakalapas sa protocol.
Ginpahayag sang natungdan nga mas maayo makatipon sila anay sang ebidensya kun ano ka matuod nga may paglapas sa layi ang operators nga nagpatigayon sang bulang sang damlag lang.
Matandaan nga una na nagpagwa sang statement si Mayor Treรฑas nga kasunod sang Resolution no. 103 sang National IATF, ginadumilian ang pagpatigayon sang bulang tubtob sa Abril 4.
Sa pinakaulihi nga impormasyon, gin-isyuhan sang show cause order sang syudad ang Rockwell coliseum.
