15 ka mga tawo ang patay kag kapin 400 ang nagapabilin nga missing bangud sang lapnagon nga sunog nga nagluntad sa Rohingya refugee camp sa Bangladesh.
Suno kay Johannes Van der Klaauw, Deputy Humanitarian Coordinator sa idalom sang United Nations High Commissioner for Refugees, masobra man sa 550 ang pilason sa amo nga sunog kag 45,000 ka tawo ang nadulaan sang puluy-an.
Padayon pa subong nga ginaimbestigaran sang mga opisyal sa Bangladesh kun ano ang rason sa natabo nga makamamatay nga sunog.
Nahibaluan nga nag-umpisa ang kalayo sa Balukhali camp malapit sa southeastern town sang Cox’s Bazar sang Lunes sang gab-i kag ginapahayag anum ka oras ang ginlawig sang sunog antes ini nadeklarar nga under control.
Bilog nga gab-i man nga nakit-an nga nagaaso ang pila ka bahin sang amo nga kampo.
Suno naman sa Ministry of Disaster Management and Relief, 40,000 huts sa amo nga kampo ang naubos lamon sang kalayo.
Duha man ka mayor nga ospital sang International Organization for Migration (IOM) kag Turkish government ang nahalitan.
