Wala pa sa gihapon nakasapol ang Iloilo City Council kay Iloilo City Mayor Jerry Treñas may kaangtanan sa posible mangin sanction sa cockpit operator nga nagpatigayon sang bulang sa Rockwell cockpit arena sa Brgy. Don Esteban, Lapuz, Iloilo City.
Ini ang kasunod man sang show cause order nga gindagdag sang Iloilo City Government sa Rockwell coliseum.
Sa interview sang Bombo Radyo kay Mayor Treñas, iya ginpahayag nga una na siya nga nagpagwa sang statement may kaangtanan sa Resolution no. 103 sang National Inter-Agency Task Force (IATF) sa diin ginadumilian ang pagpatigayon sang bulang tubtob sa Abril 4.
Nasaad man sa amo nga pagsulundan nga suspendihon ang cockfighting kag cockpit operations sa tanan nga lugar sa pungsod lakip na sa mga lugar nga napaidalom sa Modified General Community Quarantine (MGCQ).
Suno kay Treñas, indi niya mahangpan kun ngaa may nagluntad pa nga bulang sa syudad sang Iloilo apisar ginadumilian na ini.
Gin-ako man sang alkalde nga halin sang tinalikdan nga adlaw, wala siya sa iya nga opisina rason nga wala pa siya nakapakigkita kay Iloilo City Councilor Jojo Javellana, chairman sang Committee on Games, Amusement and Professional Sports, nga una na nagpahayag nga itugyan niya sa alkalde ang isyu natuhoy sa natabo nga bulang.
