ILOILO CITY – Ginahulat nalang sang Iloilo City Department of the Interior and Local Government (DILG) ang mangin sabat sang Rockwell Coliseum sa show cause order nga gin-isyu sang Iloilo City Government.
Ini ang kasunod sang paglapas sang cockpit operators nga nagpatigayon sang bulang sa Rockwell cockpit arena sa Don Esteban, Lapuz, Iloilo City sa Resolution no. 103 nga ginpagwa sang National Inter-Agency Task Force (IATF)sa diin suspendido ang cockfighting kag cockpit operations sa tanan nga lugar sa pungsod lakip na sa mga lugar nga napaidalom sa Modified General Community Quarantine (MGCQ).
Sa interview sang Bombo Radyo kay Iloilo City DILG Director Oscar Lim Jr., iya ginpahayag nga sa tion nga makasabat ang Rockwell Arena sa show cause order, i-forward nila ini sa Regional Office sang DILG.
Apang suno kay Lim, nakadepende sa Local Government Unit (LGU) sang syudad kun ano ang mangin sanction ukon salabton sang mga cockpit operators nga naglapas sa pagsulundan sang IATF.
Ginpahayag ni Lim nga nagabaton sila sang reklamo ukon report kag ang LGU sang syudad na ang in-charge sa monitoring sang mga nagapatigayon sang bulang.
Matandaan nga sa idalom sang DILG Memorandum Circular No. 2020-140 nga amo ang guideline sa pagpabalik sang pabulang, nasaad nga ginadumulian ang live telecast kag online betting.
Una naman nga ginpahayag ni Lim nga bangud tuman ka istrikto ang pagsulundan, posible lamang ang online nga bulang kag pustahanay kun magbalik na sa normal ang tanan.
