ILOILO CITY- Gin-ako sang punong barangay sang Buray, Oton, Iloilo nga makapila ka beses na niya nga ginhingyo ang pulis nga nangluthang sa iya kasilingan nga atubangon sa barangay ang mga complainants nga nagareklamo sa iya apang nagapakatig-a gid ini.
Ang suspek amo si PCpl Marvin Seasol, assigned sa Arevalo Police Station sa Iloilo City samtang ang biktima naman amo ang 55-anyos nga si Normando Estrebor.
Sa interview sang Bombo Radyo kay Punong Barangay Guilmar Capaciete, iya ginpahayag nga siya mismo ang nagapalapit kay PCpl Marvin Seasol, assigned sa Arevalo Police Station sa Iloilo City,
agud istoryahon ini nga magpahusay na lang sa barangay angot sa mga reklamo batok sa iya apang wala ini nagapasugot.
Suno kay Capaciete, kon wala lang nagpakatig-a si Seasol, posible nga wala na naglab-ot pa sa pagpangluthang niya sa iya kasilingan nga si Normando Estrebor, 55 anyos.
Gintuad man sang opisyal nga maayo man ang batasan sang pulis kon wala nakainom apang kon mahubog, nagalain ang iya aktwasyon.
Nahibaluan nga ginareklamo ni Estrebor ang magahod nga sound system sang pulis kag ang pagpanghaboy niya sang botelya sang ilimnon sa tion nga mahubog.
