ILOILO CITY – 15 na ka peke nga driver’s license ang natigayon nga matransact sang isa ka 25-anyos nga babaye antes siya nadakpan sa entrapment operation sang Land Transportation Office (LTO) Region VI sa isa ka mall sa dalan E. Lopez, Jaro, Iloilo City.
Ang arestado amo si Eldine Jane Berman, residente sang Bingawan, Iloilo.
Sa interview sang Bombo Radyo kay Atty. Gaudioso Geduspan, Assistant Regional Director sang LTO Region VI, iya ginpahayag nga P7,500 ang sukot ni Berman sa kada online transaction sang LTO services.
Suno kay Geduspan, halin pa sa Manila ang peke nga lisensya nga gina-introduce ni Berman sa iya nga mga ka-transaksyon.
10 ka adlaw antes makuha ang amo nga peke nga lisensya.
Suno pa kay Geduspan, 2020 pa sang nagsugod sang iya iligal nga aktibidad ang 25-anyos nga babaye.
Kaina sang ginpatigayon ang operasyon, nakuha sa possession ni Berman ang isa pa gid ka peke nga lisensya.
Nagapangatubang ang babaye sang kaso nga paglapas sang RA 9485 ukon Anti-Red Tape Act of 2007 kag one count sa kaso nga falsification of government document.
Santo sa record sang LTO Region VI, si Berman ang ika-anum nga fixer nga nadakpan sang Anti-Fixer team sang talatapan halin sang Disyembre 2020.
