OTON, ILOILO – Pasakaan sang kaso nga Frustrated Murder si Police Staff Sergeant Marvin Seasol, ang hubog nga pulis nga nagluthang sa iya kasilingan sa Brgy. Poblacion West, Oton, Iloilo.
Sa interview sang Bombo Radyo kay Police Captain Robert Jayson Pancha, hepe sang Oton Municipal Police Station, iya ginpahayag nga ginahitso na lang subong ang mga affidavit kag ginahulat man ang resulta sang ballistic examination agud makumpirma nga 9mm PNP-issued service firearm ni Seasol ang gingamit sa krimen.
Magluwas sa kaso-kriminal, magapangatubang man si Seasol sang kaso-administratibo nga tumuron pa sang Internal Affairs Service.
Madugay na nga may hiligut-anon sa tunga ni Seasol kag sang biktima nga si Normando Estrebor apang bisan maka-isa suno sa hepe, wala sang may nagpasaka sang kaso halin sa anuman nga kampo kag wala man sang settlement nga natabo rason nga naglab-ot pa kagab-i sa pagpangluthang.
Ginkumpirma man ni Pancha nga yara naman subong sa estable nga kondisyon ang biktima.
