Pilason ang driver sang motorsiklo matapos naaksidente kag nakabunggo sa jeep sa dalan nga sakop sang Sebaste, Sibunag, Guimaras.
Ang biktima amo si Tomas Dampay, 56 anyos kag residente sang Cabano, San Lorenzo, Guimaras.
Sa interview sang Bombo Radyo kay PSSg. Mario Asparo, imbestigador sang Sibunag Municipal Police Station, iya ginpahayag nga papauli na kuntani halin sa trabaho ang driver sang motorsiklo apang bangud nga liliku-on ang dalan, naglapaw sa linya ang motorsiklo kag nakabunggo sa jeep.
Sakay sang jeep ang siyam ka mga pasahero kag wala man sang may napilasan magluwas lang kay Dampay.
Sa subong, padayon na nga ginabulong sa ospital ang biktima.
