Nagpanawagan ang Faculty sang mga Law School sa Iloilo City kay Presidente Rodrigo Duterte may kaangtanan sa pag-appoint sang masunod nga Supreme Court (SC) Chief Justice.
Ini ang kasunod man sang natalana nga pagretiro ni Chief Justice Diosdado Peralta sa Sabado, Marso 27.
Sa interview sang Bombo Radyo Atty. Jose Mari Tirol, Dean sang University of San Agustin, College of Law, iya ginpahayag nga luyag nila ipalab-ot nga kun sin-o man ang pilion sang Presidente bilang bag-o nga Chief Justice sang pungsod, nagakadapat nga ma-address kag masolusyunan sini ang delayed justice system sang Pilipinas.
Pahayag ni Tirol, madamo na sang mga tikang nga gin-obra ang Korte Suprema agud masolbar ang judicial delay, apang mas maayo kun matutukan kag madugangan pa sang bag-o nga Chief Justice ang tikang para sa mas madasig nga pagsolbar sang human rights cases.
Pila sa mga naka shortlist agud pilian nga mangin masunod nga Chief Justice amo sanday Senior Associate Justice Estela Perlas-Bernabe, Associate Justice Alexander Gesmundo, kag Associate Justice Ramon Paul Hernando.
Gin-athag naman ni Tirol nga wala sila sang pinilian kun sin-o ang luyag nila nga mangin Chief Justice.
Ang importante lamang suno sa natungdan nga kun sin-o man ang makatal-os sa pwesto bilang Chief Justice, matuman sini ang pagpasangkad sang Justice System sang pungsod kag mahatagan man sang igtalupangod ang nagadugang nga numero sang pagpangmatay kag atake sa legal profession.
