Ginpasigurado sang Iloilo City Council nga manabat ang operators nga nagpatigayon sang bulang kag naglapas sang protocol sang Inter-Agency Task Force on Emerging Infectious Diseases (IATF) sa Rockwell Cockpit Arena sa Barangay Don Esteban, Lapuz, Iloilo City.
Ini ang kaangot sa patigayunon nga committee hearing in aide of legislation sang duha ka committee sa Iloilo City Council nga sanday Iloilo City Councilor Atty. Rommel Duron, chairman sang Committee on Rules, Ordinances, Resolution, Style, Justice and Legal Affairs kag Councilor Carlos ‘Jojo’ Javellana, ang chairman sang Committee on Games and Amusement.
Sa interview sang Bombo Radyo kay Councilor Javellana, iya ginpahayag nga ginapakamalaot niya ang paglapas sang cockpit operators sa Resolution No. 103 nga gin-isyu sang IATF sa diin suspendido ang pagpatigayon sang bulang tubtob sa Abril 4 bangud sa padayon nga pagtaas sang kaso sang COVID-19 sa pungsod.
Apisar sini, indi mahangpan sang natungdan kun nga-a nadayon ang pabulang sang Marso 22 tubtob 23 sa Rockwell Cockpit Arena.
Una na nga nag-isyu sang show-cause order si Iloilo City Mayor Jerry Treñas batok sa Rockwell Cockpit Arena kasunod sang naglapta nga video sang ginapatigayon nga bulang.
Ginpanginwala naman sang tagdumalahan sang Rockwell nga wala sang may natabo bulang sa arena sang Marso 22 kag 23.
