Nangin madinalag-on ang bloodletting activity kaupod ang local government unit sang Passi City kag Dugong Bombo sang Bombo Radyo Philippines.
Ang nasambit nga Dugong Bombo ang ginpatigayon sa Passi City Arena.
Sa interview sang Bombo Radyo kay Wilma Palma, Medical Officer III sang Department of Education (DEPED)- Division of Passi City, iya ginpahayag nga tuman ang ila pagpasalamat matapos ginpasakupan sang nanuhay-tuhay nga mga grupo ang nasambit nga bloodletting activity.
Suno kay Palma, lakip sa mga nagpasakop nga grupo amo ang Pro-Bikers Passi City Chapter, Dodge Sigma Phi, Alpha Phi Omega Passi City Chapter, 301st Infantry (Bayanihan) Brigade sang Philippine Army nga nakabase sa Dingle Iloilo, kag mga personnel sang DepEd- Division of Passi City.
Pahayag ni Palma, magluwas diri, may mga walk-ins man nga nagasuporta sa voluntary blood donation amo man ang pila ka mga grupo halin sa nanuhay-tuhay nga sektor sa amo nga syudad.
Dugang pa sang natungdan, dako ang mangin bulig sang dugo sa subong nga panahon sa tunga sang COVID-19 pandemic ilabi na sa mga nagakinahanglan nga Passinhon.
Ginsunod man suno kay Palma ang tanan nga minimum health protocols batok sa COVID-19 sa amo nga aktibidad.
