Atubangon sang isa ka suspek ang kaso nga murder sa tion nga mapamatud-an sa korte nga may yara sang evident premeditation antes ginhimo ang krimen.
Sa interview sang Bombo Radyo kay Atty. Alfredo Arungayan III, Criminal Law Professor sa University of San Agustin, College of Law, iya ginpahayag nga ang ‘murder’ ang hungod nga pagpatay ukon ang tinutuyo amo ang pagpatay samtang ang ‘homicide’ ang isa man ka krimen sa pagpatay apang wala sang intensyon kag gulpyada nga nagluntad.
Magluwas diri, kun mapaslawan ang isa ka suspek nga mapatay ang biktima, ang posible nga ipasaka nga mga kaso amo ang ‘attempted’ kag ‘frustrated’ murder.
Suno kay Arungayan, matawag nga murder ang isa ka krimen kun ini ang may ‘evident premeditation’ ukon may pagpanghanda sa pagpatay.
Nalakip diri ang pagplano, pagdesisyon kag ang tion sang pagpatay.
Sa idalom sang Article 248 sa Revised Penal Code, makabig nga murder ang isa ka kaso kun:
- May treachery ukon nagapakita sang pagtraidor;
- Nagpatay bangud sa kwarta ukon reward money;
- Nagsunog, nagpangbomba, nanglunod, nagpanghilo, nagpatay gamit ang bisan ano nga sahi sang salakyan;
- Ginhimo ang krimen sa tunga sang kalamidad kaangay sang linog, paglupok sang bulkan kag iban pa;
- May maathag nga pagpanghanda sa pagpatay; kag
- May cruelty ukon pagtorture bag-o nagpatay
Pahayag ni Atty. Arungayan, nalakip ang ‘murder’ sa ‘capital offense’.
Buot silingon, ini ang krimen nga may pinakamataas nga penalidad.
Sa subong suno kay Arungayan, ‘reclusion perpetua’ ang pamatbat sa diin mapreso sa sulod sang 20 tubtob 40 ka tuig ang isa ka tawo nga mapamatud-an nga guilty sa kaso nga murder.
Ang isa ka akusado ang indi man mahatagan sang pardon kun wala pa ini napreso sa sulod sang indi magnubo 30 ka-tuig.
Dugang pa sang natungdan, indi man mahimo makapyansa ang may kaso nga murder kun mabaskog ang ebidensya batok sa iya.
Sa homicide naman, mahimo makapyansa ang akusado bangud indi ini ‘capital offense’.
Reclusion perpetua tubtob 20 ka-tuig naman ang penalidad sang kaso nga homicide.
