Nabungguan sang nissan navara nga pick-up nga ginamaneho sang hubog nga driver ang isa man ka nissan navara nga pick up kag isa ka Public Utility Jeepney (PUJ) sa Brgy. Calaparan Arevalo, Iloilo City.
Ang driver sang pick up nga ginbungguan amo si Charles Monarca.
Samtang ang driver naman sang PUJ amo si Wilfredo Gange Jr.
Sa interview sang Bombo Radyo kay Police MSgt. Rex Diaz, traffic investigator sang Traffic Enforcement Unit (TEU) sa Iloilo City Police Office (ICPO), iya ginpahayag nga wala pa sa gihapon matumod ang identity sang hubog nga driver sang nissan navara nga pick up nga amo ang nagbunggo sa isa man ka pick up kag PUJ.
Suno kay Diaz, indi man maistorya sang maayo ang driver nga nakabunggo bangud yara ini sa impluwensya sang makahulubog nga ilimnon.
Pahayag ni Diaz, santo sa panaysayon sang mga witness, nagasarurot ang dalagan sang hubog nga driver sa diin gilayon sini nga nabungguan ang nasumalang nga PUJ kag isa man ka pick up.
Maswerte lamang suno kay Diaz nga wala sang may nasamaran sa insidente apang ang isa ka pasahero sang PUJ ang nakaeksperyensya sang pagpalanakit sang lawas sa diin ginhatagan man sang first aid sang mga otoridad.
Sa subong suno kay Diaz, indi pa nila mapalayag ang iban nga impormasyon bangud nagapadayon pa ang imbestigasyon natuhoy sa insidente.
