ILOILO CITY- Ginpaathag sang Simbahang Katolika ang importansiya sang Lunes Santo subong nga Semana Santa kag paano ini pamalandungan sang mga Kristiyano.
Ini base sa ebanghelyo ni San Juan, kapitulo 12, bersikulo uno tubtob onse nga nagasaysay nahanungod sa litaniya sa diin nagpahid si Maria sang pahamot sa tiil ni Hesus kag ginpahiran sang iya buhok sa diin ginsaway ini ni Judas Iscariote kag ginpamangkot kon ngaa wala nalang ginbaligya ang malahalon nga pahamot kag ihatag sa mga pigado ang kita.
Sa interview sang Bombo Radyo Rev. Fr. Angelo Colada, Director sang Commission on Social Communications sang Archdiocese of Jaro, diri makita ang duha ka sahi sang tawo sa diin si Maria ang nagatiglawas sang isa ka maayo nga tumuluo samtang si Hudas naman ang nagatiglawas sang tawo nga luyag lang magpamentaha kag indi maayo ang tinutuyo.
Suno kay Colada, kaangay ni Hudas, may mga tawo nga nagapakuno-kuno sa diin mas mahapos nga pekeon ang isa ka maayo nga buhat sang sa pekeon ang isa ka maayo nga tagipusuon.
Pahayag pa sang natungdan, isa ini ka pagpanghangkat sa aton agud nga mangin putli kag sinsero kita sa aton kaayuhan nga ginahimo bangud ang akto sang pagpakuno-kuno ang wala nahamut-an sang Diyos.
