Wala nadayon ang gobernador sang probinsya sang Iloilo subong nga adlaw sa iya inspection of project sa Barangay Cabalaunan, Miag-ao Iloilo.
Ini ang kasunod man kahangawa sa iya seguridad kadungan sang aniberseryo sang Communist Party of the Philippines-New People’s Army (CPP-NPA) subong nga adlaw, Marso 29.
Sa interview sang Bombo Radyo kay Iloilo Governor Arthur Defensor Jr., iya ginpahayag nga magasapol kuntani siya kay Miag-ao Iloilo Mayor Macario Napulan kaupod ang Iloilo Provincial Engineering, Agriculture kag Tourism para inspeksyunon ang Rice Terraces sang nasambit nga lugar.
Suno kay Defensor, ang rice terraces ang kabahin sang ila medium term project agud mangin modelo para sa iban nga mga bukid nga ginatamnan bangud may yara ini sang good irrigation para sa water management strategy sang Iloilo Province.
Magluwas diri suno sa gobernador, luyag man nila nga mangin kabahin sang agriculture program ang amo nga rice terraces pinaagi sa pagtanom man diri sang mga mais bilang kabahin sang Tanom Iloilo project.
Pahayag ni Defensor, ginapanan-aw man nila ang rice terraces bilang isa sa mangin tourist destination sa Iloilo Province.
