Magadeploy sang masobra 100 ka personnel ang Public Safety and Transportation Management Office (PSTMO) sa tanan nga Simbahan sang syudad sang Iloilo kag mga beach line kadungan sang pagdumdom sang Semana Santa.
Sa interview sang Bombo Radyo kay Mr. Jeck Conlu, spokesperson sang COVID-19 team sang Iloilo City Government kag amo man ang pinuno sang PSTMO, iya ginpahayag nga kaupod ang Iloilo City Police Office, tutukan nila ang pagmonitor sa mga tawo nga posible magtumpok sa mga Simbahan kag mga resort ukon baybay sa Holy Week.
Suno kay Conlu, katuyuan sini nga masunod ang tanan nga mando ni Iloilo City Mayor Treñas sa pagsunod sang health protocol sa Semana Santa.
Pahayag ni Conlu, magluwas sa mga Simbahan, padayon man sila nga magalibot sa syudad sang Iloilo.
