Gindagdagan na sang dismissal order sang National Police Commission (NAPOLCOM) ang isa sa apat ka police officer nga naangot sa pagpatay sa kontrobersyal nga negosyante nga si Delfin Britanico.
Nobyembre 29, 2016 pa gindagdagan sang dismissal order si Police Staff Sergeant Ricardo Cabrera Morante para sa kaso nga grave misconduct apang nagpadayon ini sa gihapon sa pagserbisyo bilang pulis sa din ginpahayag nga wala ma-inform ang NAPOLCOM Region 6 kag Police Regional Office 6 (PRO-6).
Si Morante ang naassign sa City Drug Enforcement Unit (CDEU) sang Iloio City Police Office (ICPO).
Ang amay mismo sang biktima nga si former Iloilo assemblyman kag Banat Partylist Representative Salvador Britanico ang nagpahanumdom sa PRO 6 may kaangtanan sa lima ka-tuig na nga dismissal order ni Morante matapos sini gin-verify sa NAPOLCOM.
Sa interview sang Bombo Radyo kay PLt. Col Joem Malong, spokesperson sang PRO 6, iya ginpahayag nga may yara na sila sang kasulatan para sa finality sang dismissal order nagikan sa Philippine National Police (PNP) Headquarters.
Suno kay Malong, sa tion nga maserbe na ang dismissal order kay Morante, pahalinon na ini sa Regional Personnel Holding and Accounting Unit (RPHAU) sang PRO 6 sa diin mauntat man ang tanan sini nga benepisyo kag sweldo.
Sa subong, restricted na sa RPHAU si Morante lakip na ang tatlo pa ka pulis personnel nga naangot sa Britanico slay case nga amo sanday Police Staff Sergeant Michael Demegillo de Felipe; Police Staff Sergeant Freddie Hibalo Libo-on; kag Police Master Sergeant Vernie Lui Escorial.
Una na ginpahayag ni Police Corporal Joseph Andrew Joven nga amo ang nangin state witness sa kaso ni Britanico sang Enero 19, 2020 sa Barangay Nabitasan, La Paz district, si Morante ang mismo nagluthang-patay sa negosyante.
