Ipasirado kag kumpiskahon sang City Veterinary Office ang karinderya nga nagabaligya ukon naga re-sell online sang frozen foods nga napamatud-an ginkuha sa African Swine Fever (ASF) affected area.
Sa interview sang Bombo Radyo kay Dr. Tomas Forteza, pinuno sang Iloilo City Veterinary Office, iya ginpahayag nga ginkadtuan na nila ang nasambit nga karinderya sa distrito sang Jaro apang indi sila makaobra sang nagakaigo nga tikang bangud wala ang tag-iya.
Suno kay Forteza, bayolasyon ini sa mando ni Iloilo City Mayor Jerry Treñas sa diin ginadumilian ang pag-import sang baboy nagikan sa ASF affected areas sang pungsod.
Pahayag ni Forteza, sa subong, balikan nila ang amo nga karinderya sa distrito sang Jaro sa diin kun wala sa gihapon ang tag-iya, ipasirado nalang nila ini.
