Natalana nga magpagwa sang pagsulundan si Iloilo Governor Arthur Defensor Jr. may kaangtanan sa temporaryo nga pagsuspende sang operasyon sang mga negosyo sa resorts ukon baybay sa probinsya sang Iloilo umpisa Myerkules Santo, Marso 31 tubtob sa Easter Sunday Abril 4.
Ini ang kasunod sang kahangawa sa posible nga pagtimbuok sang COVID-19 cases sa Iloilo Province kadungan sang Semana Santa.
Sa interview sang Bombo Radyo kay Atty. Suzette Mamon, Provincial Administrator sang Probinsya sang Iloilo, iya ginpahayag nga ginadihon na subong sang gobernador ang advisory ukon directive agud ipasirado anay ang mga accomodation establishments sa probinsya kasunnod ang pagdumdom sang Holy week.
Suno kay Mamon, nagapakig-angot man sila sa tanan nga alkalde sang probinsya agud makuha ang ila mga sentyemento may kaangtanan sa temporaryo nga pagpasirado sang mga tourism destination.
Pahayag ni Mamon, una naman nga nahisugtan sang banwa sang Leon kag Alimodian nga ipasirado sa Holy Week ang ila mga pilgrimage sites.
Nagpanugyan man ang natungdan nga mas nagakadapat nga magpalamandong ang tanan kag magpabilin sa balay kaupod ang pamilya agud hiwaton sang mas makahulugan ang pagdumdom sang Semana Santa.
