Wala napalab-ot sa Management sang Rockwell Cockpit Arena sa Barangay Don Esteban, Lapuz, Iloilo City ang advisory nagikan sa Office of the City Mayor antes natabo ang ginpatigayon nga bulang sa lugar.
Marso 22, sang gin-assign si Neil Escala, isa ka job hire sang Public Safety and Transportation Management Office (PSTMO) agud ihatag kay Rodrigo Dellomes, tag-iya sang Rockwell Cockpit Arena ang advisory nga nagadumili sang pabulang sa syudad sang Iloilo.
Gin-ako ni Escala nga wala niya mahatag ang amo nga pagsulundan sa pamunuan sang nasambit nga arena bangud nalipatan niya ini sa iya kotse.
Marso 23 na sang ginhatag ni Escala ang amo nga advisory kay Dellomes.
Matandaan nga ginpatigayon ang bulang sa Rockwell Cockpit Arena sang Marso 22, las 11:00 sang gab-i tubtob las 7:00 sang aga, Marso 23.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Rules, Ordinances, Resolution, Style, Justice and Legal Affairs sang Sangguniang Panlungsod, iya ginpahayag nga nahisugtan nila sa ila committee hearing nga itugyan na lamang kay Iloilo City Mayor Jerry Treñas ang ubrahon nga tikang may kaangtanan sa kontrobersyal nga pabulang sa nasambit nga arena.
Suno kay Duron, ‘no show’ man ang tag-iya sang cockpit arena sa konseho.
Pahayag sang natungdan, maathag nga ginbayolar sang Rockwell Cockpit Arena ang Resolution No. 103 nga gin-isyu sang Inter-Agency Task Force for the Management of Emerging Infectious Diseases (IATF), sa diin nasaad nga suspendido ang pagpatigayon sang bulang tubtob sa Abril 4 bangud sa padayon nga pagtaas sang kaso sang COVID-19 sa pungsod.
Dugang pa sang natungdan, mas maayo nga i-refer man nila sa alklade ang nangin pahayag sang job hire nga si Escala may kaangtanan sa rason kun nga-a wala mahatag gilayon sa pamunuan sang rockwell ang advisory nga nagadumili sang bulang sa syudad sang Iloilo.
Nahibaluan nga natalana nga magpatigayon sang joint committee hearing sanday Councilors Duron kag Carlos ‘Jojo’ Javellana, ang chairman sang Committee on Games and Amusement sa Abril 6 may kaangtanan sa natabo nga bulang.
