ILOILO CITY- Nagpanawagan ang hepe sang Iloilo City Police Station 1 sa security guard nga nagluthang-patay sa delivery boy sang Food Panda nga magsungka na lang sa otoridad.
Sa interview sang Bombo Radyo kay PCapt. Shella Mae Sangrines, iya ginpangabay sa suspek nga si Argie Solis, gwardiya sang Malayan Bank sa Quezon Street, Iloilo City Proper nga mas maayo nga magsurrender ini agud nga makahatag siya sang kasanagan sa natabo kag kon ngaa naglab-ot gid ini sa pagpangluthang-patay sa biktima nga si Joemar Sanchez sang Bitoon, Jaro, Iloilo City.
Nagpanawagan man si Sangrines sa mga kakilala kag pamilya sang suspek nga ganyaton ini nga magsungka gilayon sa otoridad.
Samtang, nagpaathag naman si Sangrines kon ngaa wala gindala sa ospital ang biktima sa pihak sang presensya sang Iloilo City Emergency Responders.
Suno kay Sangrines, base sa nangin assessment sang otoridad, wala na sang ‘signs of life’ sa biktima rason nga ginhulat nalang ang pag-abot sang Scene of the Crime Operation.
