Wala sang bisyo, masinadyahon kag wala man sang kontra ang biktima nga ginluthang-patay sang isa ka gwardiya sa kilid sang Robinson’s Place- Main, corner Quezon kag J. De Leon Streets, Iloilo City Proper.
Ang biktima amo si Joemar Sanchez, residente sang Brgy. Bitoon, Jaro, Iloilo City kag delivery boy sang Food Panda.
Ang suspek amo si Argie ‘Nunung’ Solis, gwardiya sang Malayan Bank sa Quezon Street kag kabahin sang security agency nga Grabato Investigation Risk Management and Security Service Incorporated.
Sa exclusive interview sang Bombo Radyo kay Lanie Palma, tiya kag amo ang nagpadako mismo sa biktima, iya ginpahayag nga masadya pa nga nagpamahaw si Sanchez kaupod ang iya mga pakaisa bag-o ini naghalin sa ila nga balay sa Bitoon, Jaro, Iloilo City subong nga adlaw para magtrabaho.
Suno kay Palma, wala sang kontra ang iya hinablos kag wala man sila nakakilala sa suspek nga si Solis.
Nagahilibion naman samtang ginasaysay ni Palma kun ano kamaayo ang batasan sang iya hinablos bangud humalin sang gamay, siya man ang nagpaeskwela kag nagtudlo sang maayo nga paminatasan.
Pahayag ni Palma, tuman ka pigado ang ginikanan sang biktima sa Lambunao, Iloilo, rason nga halin sang una siya nalang ang nagtatap sa iya nga hinablos.
Nagwangal naman ang natungdan kun nga-a wala na ginhingagaw dala sa ospital ang iya hinablos sang natabo ang insidente sa diin posible nga mabuhi pa tani ini.
Matandaan nga una na ginpahayag ni PCapt. Shella Mae Sangrines nga base sa nangin assessment sang otoridad, wala na sang ‘signs of life’ sa biktima rason nga ginhulat nalang ang pag-abot sang Scene of the Crime Operation (SOCO).
