Masami nagayuhom, mainabyanon, mahapos palapitan kag tuman ka buot.
Ini ang pagkilala sang mga katapo sang Sto. Tomas de Villanueva Parish sa Miagao, Iloilo kay the late Reverend Father Winifredo Losaria nga nagtaliwan sang Abril 2 kadungan sang Byernes Santo kag iya nga 42nd Sacerdotal Anniversary.
Gincremate na si Father Losaria kag yara subong ang iya abo sa Sto. Tomas de Villanueva Adoration Chapel.
Sa interview sang Bombo Radyo kay Joy Geamal, anay choir member, iya ginpahayag nga si Father Losaria ang sadto anay naglaygay kag naghatag sa iya anak sang rosarito.
Kun masumalang man ni Geamal si Father Losaria nga naga-jogging kun aga, wala gid ini nagakapaslawan nga magbugno kag masami pa nagapamangkot sa iya kun kamusta bala siya.
Disyembre 2020 pa ang katapusan nga kitaay sang duha apang kun may yara sang kinahanglan ang tawo sa nasambit nga pari, handa gid ini nga magbulig.
Matapos ginlockdown ang Miagao Church sang Marso 7, nagpadulong si Geamal sa opisina ni Father Losaria agud nga mangamusta.
Sa iya pagkahibalo, nagpositibo sa COVID-19 sadto ang pari apang ini man ang nakarecover.
Apang ginkakibot na lang niya nga sang Abril 2, nagtaliwan na si Father Losaria.
Naghibi sa tuman nga kasubo ang Presidente sang St. Cecile’s Crusade — ang choir group sang Sto. Tomas de Villanueva Parish sa Miagao, Iloilo matapos nagtaliwan si Reverend Father Winifredo Losaria.
Sa interview sang Bombo Radyo kay Del Marie Callado, iya ginpahayag nga si Father Losaria amo ang nagapati sa ila nga kapasidad kag nagasuporta sang ila nga passion, talents kag serbisyo sa simbahan kag sa Diyos.
Kada matapos ang second mass, ginapatawag sila sang pari agud ululupod nga magpamahaw kag nagapangamusta gid ini sa ila.
Suno kay Callado, wala gid nila ginlauman nga mangin handumanan na lang ang tanan kag indi na nila makaupod pa si Father Losaria.
Madamo pa kuntani sila nga mga choir members sang plano kaupod ang pari.
Ulihe niya ini nga nakaupod sang nagpatigayon pa sang misa si Father Losaria sa isa ka lubong kag nakit-an mismo ni Callado nga nagakabudlayan na ini kag makaligad ang pila ka adlaw ila nahibaluan nga nagpositibo ini sa COVID-19.
Apisar nga masubo, ginatugyan na lang sang mga choir members sang simbahan ang tanan sa Diyos bangud nagapati man sila nga malipayon na subong si Father Losaria.
