LEGANES ILOILO – Nag-ugat sa frustrated robbery ang pagluthang-patay sa anak ni Leganes, Iloilo Sangguniang Bayan Member Larry Labuson sa bahin sang Metropolis Avenue, Jaro, Iloilo City.
Ang biktima amo si Carl Dominic Labuson, 19 anyos kag residente sang Leganes, Iloilo.
Sa interview sang Bombo Radyo kay Police Captain Shella Mae Acanto Sangrines, spokesperson sang Iloilo City Police Office (ICPO) , iya ginpahayag nga manugpatughong sang gatong si Labuson sang iya motorsiklo sa bahin sang sa Leganes, Iloilo sang makit-an ang isa ka suspek nga may ginahold-up nga babaye.
Diri kag ginlagas ni Labuson ang suspek tubtub nag-abtanay ang mga ini sa bahin sang Metropolis Avenue, Jaro, Iloilo City sa diin nagbina-isay pa ang suspek kag biktima.
Pahayag ni Sangrines, diri kag ginluthang sang suspek si Labuson nga nag-angkon sang pilas sa dughan kag ulo nga amo ang gintunaan sang iya kamatayon.
Sa subong, padayon pa ang ila imbestigasyon natuhoy sa krimen sa diin, ginacheck man nila ang mga closed circuit television (CCTV) footages malapit nga ginluntaran sang krimen.
