ILOILO CITY- Nagahilibion nga ginsaysay sang kamagulangan nga anak ni Lorry Mae Baylon, ang nagabusong nga iloy nga napatay upod sa iya ginadala nga lapsag, kon paaano ginpulihan kastigo ang iya iloy sang mag-asawa nga maestra kag retirado nga pulis sa Zone 5, Boulevard, Molo, Iloilo City.
Sa interview sang Bombo Radyo kay Loraine, 12 anyos, subang sa apat ka kabataan sang biktima, iya ginpahayag nga nasaksihan gid niya kon paano ginsakit sang mga suspek nga sanday retired PSSgt. Joseph Agana kag Chona Agana, ang iya iloy.
Suno kay Loraine, nagsulong ang mga suspek sa ila balay rason nga nagkuha sang binangon ang iya iloy apang naagaw ini sang retirado nga pulis nga ginaalegar nga ginhanaan man sang binangon ang biktima.
Dugang pa sang menor de edad, nagtambag siya rason nga diutayan lang siya nga maigo sang binangon nga ginahana ni Agana.
Gintudlo naman ni Loraine si Jona “Bebe” Agana, anak sang retired police, nga amo ang nagbali sang kamot sang iya iloy samtang ang umagad naman sang retired police nga si Alfred Amamyo amo ang nagsumbag sa nawong ni Baylon.
Ginapahayag nga nag-ugat ang insidente matapos nagwangal ang mag-asawa nga Agana sa pila ka kabataan lakip na ang anak ni Baylon nga nagahampang kag nagaginahod sa atubang mismo sang ila balay.
Ginsaway ni Baylon ang iya nga anak nga magpauli kag ginsinggitan nga indi na maghampang sa atubang sang balay sang mag-asawa agud indi mapasibangdan nga nagaginahod apang matapos mabatian sang mag-asawa nga Agana ang pagwangal ni Baylon, ginsulong kag ginpulihan nila ini nga gin-intrahan sang ila mga anak nga sanday John Cyril, Bebe kag umagad nga si Alfred.
Hustisya naman ang luyag nga maangkon ni Loraine para sa iya napatay nga iloy.
Suno naman kay Lovelyn Baylon, utod sang biktima, masami nga sentimento sang iya utod nga si Lorry May amo nga ginasimo-simo lang siya sang pamilya Agana bangod pigado lang sila kag wala sang ineskwelahan.
Pahayag niya, wala na naantos pa sang iya utod ang pagpakanubo sa iya sang pamilya Agana rason kon ngaa wala na niya ginpalampuwas ang mapakita ang iya hibubun-ot sa pamilya Agana.
