ILOILO CITY – Natalana nga magpapanaog sang bag-o nga Executive Order si Iloilo City Mayor Jerry Treñas sa syudad sang Iloilo natuhoy sa pag-istrikto sang COVID-19 protocol.
Ini ang kasunod sang pag-apruba sang Inter-Agency Task Force (IATF) sang 1 week moratorium nga ginhingyo sang syudad kag probinsya sang Iloilo agud suspendihon ang mga flights kag trips nagikan sa National Capital Region (NCR), Cavite, Laguna, Batangas, Rizal, Quezon kag Cebu pasulod sa Western Visayas.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang nasambit nga moratorium ang magalawig umpisa Abril 4 tubtob 10.
Suno kay Treñas, mas istriktuhan pa ang pagdumili sang social gathering kag pasiguraduhon nga 30 percent lamang ang capacity sang mga nagatrabaho sa mga opisina kag Business Process Outsourcing (BPO) Companies.
Magasapol man ang alkalde sa pamunuan sang BPO companies subong nga adlaw agud nga mapasiguro ang work from home set up sa iban nga mga empleyado.
Pahayag sang alkalde, lantawon man niya kun paano masolusyunan ang capacity sang tanan nga mga ospital sa syudad sang Iloilo nga makacater sang COVID-19 patients.
Samtang, may kaangtanan sa padayon nga nagataas nga kaso sang COVID-19 sa probinsya sang Antique, ginpahayag ni Treñas nga nakahanda siya maghatag sang bulig kun kinahanglan.
Suno kay Treñas, indi man pagsiraduhon ang borders sang syudad sa mga pumuluyo nagikan sa Antique nga nagapadulong sa Iloilo City.
Apang suno sa natungdan, kun padayon nga magtimbuok ang kaso sang COVID-19 sa Antique, magasapol sila sang iban pa nga local chief executives sa Western Visayas kun ano ang mas maayo nga himuon.
