Hugot nga ginpanidugan sang pamilya Agana nga lunsay kabutigan ang ginahaboy nga alegasyon sa ila sa diin sila ang ginatudlo nagpangkastigo kag nangamot sa napatay nga nagabusong nga iloy kag lapsag nga ginadala sini sa Zone 5, Boulevard, Molo, Iloilo City.
Sa interview sang Bombo Radyo kay Chona Agana, isa ka maestra sa Molo 1 Elementary School, iya ginpahayag nga gina-ako nila nga may pagbinaisay nga natabo sa ila pamilya kag sang 27-anyos nga si Lorry Mae Baylon bangud sa ginahod kag hinampang sang mga kabataan lakip na ang anak sini sa atubang mismo sang ila balay.
Suno kay Agana, madamo sang natabo kay Baylon bag-o kag matapos ang ila pagbinaisay.
Marso 21 sang kaagahon suno sa natungdan sang may natabo nga komosyon sa balay ni Baylon nga ginkakibot man nila sa ila lugar sa diin nagmaoy ang utod sini kag nagpinanghaboy sang mga gamit.
Pahayag ni Agana, matapos ang ila pagbinaisay ni Baylon sang Marso 24, nakit-an pa nila nga naglibod sang lamayo ang iloy kag yara man sa maayo nga kahimtangan.
Gin-athag man sang natungdan nga wala sang pulihay nga natabo bangud ginkadtuan lamang nila si Baylon sa ila nga balay agud mapahangop diri kun nga-a ginsaway nila ang mga kabataan lakip na ang anak sini nga nagahampang kag nagaginahod sa atubang sang ila balay.
Una na ginpahayag sang bana sang maestra nga si retired Police Staff Sgt. Joseph Agana nga ginsaway lang niya ang kabataan sang amo nga tion bangud nga nagakatulog ang iya bata nga nagatrabaho sa call center nga nagapahuway kon adlaw kag nagatrabaho kon gab-i.
Apang nagwangal si Baylon kag naakig sa diin nagkuha pa ini sang binangon, rason nga nagtabang ang duha ka mga bata sang mag-asawa nga maestra kag retirado nga pulis lakip na ang ila umagad agud mapunggan ang iloy ilabi na nga nagabusong pa ini.
Gin-ako ni Agana nga indi niya mahangpan kun ngaa sila ang ginatudlo nga mga suspek sa kamatayon ni Baylon sa diin wala man sila nagpangamot diri kag baisay lamang ang natabo.
Nagapasalamat pa si Agana nga navideohan man sang pamilya ni Baylon ang insidente bangud nakit-an diri nga maathag nga indi matuod nga gintindakan, ginsumbag kag ginsakit nila ang iloy.
Nagpanawagan naman ang maestra sa publiko nga indi sila paghusgahan bangud matuod ang ila panindugan nga wala sila nangamot kay Baylon kag mas maayo nga intindihon kag hibaluon sang mga tawo ang matuod nga natabo bag-o magbuya sang tinaga.
