Hatagan sang P100,000 ang sin-o man nga makatudlo sa nagluthang-patay sa anak ni Leganes, Iloilo Sangguniang Bayan (SB) Member Larry Labuson sa bahin sang Metropolis Avenue, Jaro, Iloilo City.
Ang biktima amo si Carl Dominic Labuson, 19 anyos kag residente sang Barangay Carimayor, Leganes, Iloilo.
Sa interview sang Bombo Radyo kay SB Member Labuson, iya ginpahayag nga padayon nga nagahatag sang update sa ila ang Jaro Police Station natuhoy sa nagapadayon nga imbestigasyon sa natabo sa iya nga anak.
Suno kay Labuson, may yara na sang lead natuhoy sa suspek ang Jaro Police Station apang indi pa mapat-od sa subong bangod dako man nga pagpanghangkat sa ila ang indi klaro nga madasig nga hitabo nga nakit-an sa Closed-circuit television (CCTV) cameras sa Metropolis Avenue, Jaro, Iloilo City.
Ginpahayag ni Labuson nga tuman ka importante sa ila nga mahatagan na sang nagakaigo nga hustisya ang pagkamatay sang iya anak sa diin nagaplano man sila nga magdangop sa National Bureau of Investigation (NBI).
Nag-apelar man sa bug-os nga kapulisan si Labuson nga buligan ang ila pamilya nga matumod na ang nagluthang-patay sa iya anak.
Matandaan nga Marso 3 sang natabo ang insidente nga nag-ugat sa isa ka frustrated robbery sa diin nangin witness ang biktima kag sang ginlagas niya ang wala makilal-an nga suspek, nagbinaisay pa ang mga ini sa dalanon nga nagresulta sa pagpangluthang sang suspek.
Nag-angkon sang pilas sa dughan kag ulo ang biktima nga amo ang gintunaan sang iya kamatayon.
