Gin-athag ni Antique Gov. Rhodora Cadiao nga wala niya ginbalibaran ang tanyag nga bulig ni Iloilo City Mayor Jerry Treñas.
Ini ang may kaangtanan sa nagataas nga kaso sang COVID-19 sa Antique.
Sa interview sang Bombo Radyo kay Gov. Cadiao, iya ginpahayag nga wala gin-aprubahan ni Department of the Interior and Local Governmemt (DILG) Undersecretary Epimaco Densing III ang hingyo kuntani niya nga border control sa mga kaiping nga probinsya bangud nga yara sa Modified General Community Quarantine (MGCQ) ang bug-os nga Western Visayas.
Apisar sini, border control sa kada munisipalidad na lang sa Antique ang ginapatuman agud nga mapunggan ang paglapta sang virus.
Sa pagkamatuod suno kay Gov. Cadiao, wala man sila nagkulang nga mga opisyal bangud ginapaidalom man sa swab test ang mga may sintomas sang COVID-19 kag ang mga samples ang ginadala man sa syudad sang Iloilo kag sa Philippine Red Cross.
May yara man kuntani sang Molecular Laboratory ang Antique apang wala pa ini naga-operate rason nga nagahingyo ang gobernador sa Department of Health nga padasigon na ang training sa mga staffs sang laboratoryo agud nga ma-accredit na ini kag maggamit.
