Nagdangat sa 541 ka mga health worker sa Western Visayas ang nabakunahan na sang second dose sang COVID-19 Vaccine nga halin sa Sinovac.
Sa interview sang Bombo Radyo kay Dr. Mary Jane Juanico, pinuno sang Infectious Disease Cluster Unit sang Department of Health (DOH) Region VI, iya ginpahayag nga sa 541 nga numero sang mga health workers nga nabakunahan sang second dose sang Abril 5, 290 diri ang nagikan sa Bacolod City kag 251 ang sa Iloilo City.
Suno kay Juanico, 28 tubtub 32 days ang interval sa first dose kag sa second dose sang Sinovac vaccine sa diin Marso 5 sang ginbakunahan sang first dose sang amo nga bakuna ang nasambit nga 541 tanan ka mga health worker.
Pahayag ni Juanico, matapos ang 24 ka-oras nga monitoring sa mga health worker nga ginhatagan sang second dose sang Sinovac Vaccines, wala man sila sang may nakaeksperyensya sang adverse side effects.
Sa subong, may yara na sang kabug-usan nga 20,202 nga first kag second dose sang COVID-19 vaccines halin sa Sinovac nga nabaton ang DOH Region VI.
Samtang, liwat man nga ginpaathag ni Dr. Juanico nga bisan ano nga sahi ukon brand sang COVID-19 vaccine ang makahatag sang 50 percent nga proteksyon sa pag-angkon sang mild COVID-19, 78 percent batok sa mga moderate disease kag 100 percent batok sa severe kag critical nga COVID-19 condition.
