Ginmanduan ni Iloilo Governor Arthur Defensor Jr. ang tanan nga mga barangay official sa probinsya sang Iloilo nga hugot nga ipatuman ang pagdumili sang social gatherings.
Ini ang kasunod sang ginpapanaog nga Executive Order 183 sang gobernador sa diin nasaad nga dumilian ang pagtililipon sa publiko kaangay sang birthday party, fiesta, wedding reception, baptismal banquet, anniversary celebration kag iban pa nga aktibidad sa barangay nga lebel.
Sa interview sang Bombo Radyo kay Governor Defensor, iya ginpahayag nga hugot nga ipatuman sa tanan nga Local Task Forces pinaagi sa Patrulya ng Bayan-Barangay Enforcement Team (BaCod PnB-BET) ang pagpalapnag sang impormasyon sa bulig sang mga Punong Barangay, ang pagdumili sang social gatherings.
Suno kay Defensor, pasugtan ang mga selebrasyon sa household levels ukon sa sulod sang balay apang limitado lamang sa immediate nga mga myembro sang pamilya kag iban pa nga residente sa sulod sang balay.
Padayon man nga iga-monitor sang Local Task Forces ang schedule sang mga fiesta sa barangay sa diin ihatag ini liwat nga memorandum sa mga Punong Barangay lima ka-adlaw bag-o ang adlaw mismo sang fiesta agud mapahanumdom ang mga residente sang barangay nga limitahan ang fiesta thanksgiving celebration sa immediate nga mga myembro sang pamilya kag iban pa nga residente sa sulod sang balay.
