Nakabaton na sang financial assistance ang 16 ka mga coastal barangay sa Buenavista, Guimaras gikan sa AC Energy kaangot sa natabo nga oil spill sa kalalawran sang Guimaras kag Iloilo sang Hulyo 3, 2020.
Sa interview sang Bombo Radyo kay Buenavista, Guimaras Mayor Eugene Gallo Reyes, iya ginpahayag nga sa 17 tanan ka coastal barangay sa banwa sang Buenavista, ang Barangay Zaldivar nalang ang wala pa sa gihapon nakabaton sang ayuda sa diin Marso 31 sang nagpagwa man ang AC Energy sang listahan sang mga claimant kag fisherfolk nga disqualified nga makabaton sang ayuda.
Suno kay Reyes, bangud sini, nakigsapol sila sa pamunuan sang AC Energy pinaagi sa ila ginhire nga law firm natuhoy sa rason sang disqualification sa pagbataon sang ayuda sang pila ka mga claimant nga kompleto man ang requirements kag dokumento.
Pahayag sang alkalde, nagpasalig man ang AC Energy nga pagkatapos sang ikaduha nga hugnat sang pagpanagtag sang ayuda sa subong nga bulan sang Abril, magapatigayon sila sang re-validation sa mga dokumento sang mga claimant nga nadisqualify agud makabaton sang cash assistance.
Dugang pa niya, magasapol siya sa tanan nga barangay officials sang 17 ka coastal barangay lakip na ang mga pamunuan sang fisherfolks agud nga malantaw ang mahimo mabulig sa mga tawo nga lehitimo nga naapektuhan sang oilspill apang na disqualify nga makabaton sang ayuda.
