Gin-athag ni Iloilo City Mayor Jerry Treñas nga sang tinalikdan pa nga tuig nakaplano nga hatagan sang salakyan ang tanan nga konsehal sang syudad sang Iloilo.
Ini ang kasunod sang kontrobersyal nga pag-procure sang Iloilo City Government sang 13 ka units sang 4×2 Mitsubishi Strada pick-up trucks sa tunga sang ginapangatubang nga COVID-19 pandemic.
Sa interview sang Bombo Radyo kay Iloilo City Mayor Jerry Treñas, iya ginpahayag nga ang mga ipanagtag nga brand new nga mga salakyan para sa mga Iloilo City Councilors ang para sa mobility sang ila opisina kag indi para sa ila personal nga utilization.
Suno kay Treñas, desisyon na sang mga konsehal kun batunon nila ukon indi ang mga salakyan.
Apang sa mga indi naman magbaton, ihatag ini diretso sa mga opisina sa Iloilo City Hall nga mas nagakinahanglan.
Nagpanindugan man ang alkalde nga wala nagautang ang syudad sang Iloilo sang pondo para sa COVID-19 response gani indi dapat mangin isyu ang pagpanagtag sang salakyan sa tunga sang COVID-19 pandemic bangud may pondo man nga napain diri ang gobyerno.
Pahayag ni Treñas, indi ‘luxurious’ ang mga salakyan nga ginbakal sang gobyerno kag ini ang kaangay sang Public Utility Vehicle nga makadala kag hakwat sang tanan nga kinahanglanon sang mga konsehal sa diin kadam-an sa ila ang nagalibot sa syudad para sa ila trabaho kag mga proyekto.
ANO ANG KABAYLO SANG MGA SALAKYAN
‘Waay gid pirmi sang insakto bisan ano pa ubrahon mo..Syado kalayo.’
Ini ang ginpahayag sang alkalde sang syudad sang Iloilo may kaangtanan sa mga nagalaslas sa iya nga pamulitiko ang rason sang iya pagpanagtag sang salakyan sa mga konsehal sang Iloilo City.
Sa interview sang Bombo Radyo kay Iloilo City Mayor Jerry Treñas, iya ginpahayag nga apisar madamo sang mga nagapakamalaot, obrahon man niya sa gihapon sang insakto ang iya katungdanan.
Suno kay Treñas, kaangay nga katupong lang niya ang mga konsehal sang Iloilo City, rason nga ginhatagan niya sang kahigayunan nga makadesisyon ang mga ini kun batunon nila ang brand new nga mga salakyan ukon indi.
Pahayag sang alkalde, indi na dapat paghatagan sang malisya ang mga salakyan nga ipanagtag sa mga konsehal bangud para ini sa pagpasangkad sang trabaho kaangay sang pagpanagtag man sang tatlo ka van sa special weapons and tactics (SWAT), 25 ka big bikes kag mountain bikes sa mga pulis, kag 10 man ka big bikes sa mga personnel sang Public Safety and Transportation Management Office (PSTMO).
Dugang pa niya, nagahatag man ang gobyerno sang transportation vehicle sa iban nga departamento, gani wala man sang malain kun mahatagan man sang salakyan ang mga konsehal sang syudad sang Iloilo.
”Waay kita bala nagautang para sa COVID-19 Response. Waay gid pirmi sang insakto bisan ano pa ubrahon mo…Ang akon lang gusto ipabalo sa tanan, these are not ‘luxurious’ nga mga salakyan, oridinaryo ni. Gahatag man ta gani pick-up sa aton nga pulis. It is not something to be extra excited about.”
Nahibaluan nga P14.4 million ang budget sang Iloilo City Government sa amo nga mga salakyan nga ginkuha sa Capital Outlay Fund sa idalom sang Iloilo City Mayor’s Office.
