ILOILO CITY – Napasakaan na sang kaso ang scammer nga nagapakilala kag nagagamit sang pangalan ni Iloilo 5th District Board Member Atty. Carol-V Espinosa-Diaz.
Ang arestado amo si Wardee Canillo, residente sang Concepcion, Iloilo City Proper kag nagapakilala bilang Chief of staff sa opisina ni Board Member Espinosa-Diaz.
Sa exclusive interview sang Bombo Radyo kay Board Member Espinosa-Diaz, iya ginpahayag nagapanukot si Canillo sang P30.00 para sa documentary fee kag P5,000 para sa ‘Pabahay’ sa Estancia, Iloilo.
Suno sa natungdan, kapin 300 na ka mga tawo ang nakuhaan ni Canillo sang kwarta sa banwa sang Estancia, Iloilo.
Si Canillo ang gindakop pinaagi sa entrapment operation sang Estancia Municipal Police Station sa pagpanguna sang hepe nga si Police Major Aldren Lamera kag ni Hon. Punong Brgy. Joy Salarozan sang Brgy. Tabuan, Estancia, Iloilo.
Gin-athag naman ni Espinosa-Diaz nga indi konektado sa ila opisina si Canillo.
Si Canillo ang nagapangatubang sang kaso nga Article 315 sang Revised Penal Code ukon Estafa kag Article 177 sang Revised Penal Code ukon Userpation of Authority.
