Nagapanindugan si Presidente Rodrigo Duterte nga una pa lang , iya na nga ginpaandaman ang publiko batuk sa makalalaton kag makamamatay nga coronavirus disease 2019 (COVID-19).
Suno kay Pres. Duterte, gin-abisohan na niya ang publiko sadto pa lang nga mahimo nga mangin pandemya ang COVID-19 kag wala sang mangin bulong para sa nasambit nga balatian.
Nahibaluan nga sang Enero 29, 2020, ginpahayag sang Presidente nga nagahanda na ang Pilipinas sa “worse-case scenario” bangud sa lapnagon nga paglapta sang novel coronavirus — ang sadto anay tawag sa COVID-19.
Sa nasambit nga petsa, linibo na ka mga tawo ang natapikan sang balatian sa nanuhay-tuhay nga bahin sang pungsod kag masobra 100 na ang napatay sa China.
Sa amo sa gihapon nga petsa, hilway pa ang Pilipinas sa virus apang may yara na sang 23 ka mga tawo nga “under observation” bangud posible nga infected sang COVID-19.
Sa pihak sini, nagpamalibad si Pres. Duterte nga magpatuman sang travel ban sa China sa diin iya ginpahayag nga mangin “unfair” ini sa China bangud may iban man nga mga pungsod nga may kumpirmado nga kaso sang balatian.
Pebrero 2, 2020, nagpatuman ang presidente sang travel ban sa mainland China kag sa mga special administrative regions nga ginalakipan sang Hong Kong kag Macau.
Ang Taiwan ang nalakip man apang ginlift ini sang Pebrero 14, 2020.
Sang nakarekord ang Pilipinas sang una nga duha ka kaso sang COVID-19, gindula ni Pres. Duterte ang kahangawa sang tawo sa diin iya ginpahayag nga indi kinahanglan sang publiko nga mangin “hysterical.”
Nanindugan man ini nga indi niya paglimitahan ang iya mga public engagements sa pihak sang kahangawa nga dala sang virus kag magapadayon pa ini sa pag-uyat sa kamot sang tawo baliskad sa abiso sang tiglikom sang Department of Health (DOH).
Ginpanginbulahan pa ni Duterte ang DOH bangud sa pagbulig tapna kag “efficient response” batuk sa virus.
Marso 16, 2020, ginpaidalom niya ang Luzon region sa isa ka bulan nga enhanced community quarantine bangud sa nagataas nga kaso sang COVID-19 sa pungsod.
Nagdeklara man ang presidente sang state of public health emergency sa bug-os nga Pilipinas.
