ILOILO CITY- May nakit-an nga paglaom ang mga stakeholders nga nagapamalabag sa pagtukod sang oil depot sa Talusan , Dumangas, Iloilo nga indi madayon ang proyekto.
Sa interview sang Bombo Radyo kay Atty. Ramar Neil Pascua, director sang Environmental Management Bureau Region 6, iya ginpahayag nga apisar aprubado na ang proyekto sa lebel sang Local Government Unit sang Dumangas, kinahanglan sa gihapon nga makakuha sang Environmental Compliance Certificate (ECC) gikan sa EMB ang proponent sang oil depot nga amo ang Greyhorse Energy Incorporated.
Suno kay Atty. Pascua, makakuha lang sang ECC ang Greyhorse kon may yara sang ini sang mapresentar nga Affidavit of No Objection.
Pahayag sang EMB regional director, bangud madamo sang nagapamalabag sa amo nga proyekto, mabudlayan ang proponent sini nga maka-secure sang amo nga affidavit.
Suno pa sa iya, sa tion nga mapangitaan sang pamaagi sang proponent agud maresolba ang pagpamalabag sang mga stakeholders kag maka-secure sang Affidavit of No Objection agud makaproseso sang ECC, iga-assess ini sa gihapon sang EMB.
Dugang pa sang natungdan,magluwas sa nasambit nga affidavit, madamo pa sang iban nga documentary requirements nga kinahanglan mapasa sang proponent antes makapatigayon sang assessment ang EMB bag-o ihatag ang ECC.
Gin-athag naman niya nga ang ECC indi isa ka permit kundi ‘tool’ lang nga nagadetermina sang environmental impact sang proyekto sa area kon sa diin ini tukuron.
Nahibaluan nga pila sa mga ahensya nga nagapamalabag sa proyekto amo ang Bureau of Fisheries and Aquatic Resources, Southeast Asian Fisheries Development Center, kag ang grupo nga Iloilo Fish Producers Association.
