TEXAS, USA – Temporaryo nga ginpauntat sang health officials ang COVID-19 Vaccination gamit ang single-dose Johnson & Johnson COVID-19 vaccine sa mga pumuluyo sa Texas, USA.
Ini matapos nakaeksperyensya sang “rare kag severe nga sahi sang blood clot” ukon pagsulong sang dugo ang anom ka babaye matapos ginbakunahan sang nasambit nga bakuna batok sa COVID-19.
Santo sa advisory nga ginpagwa sang Centers for Disease Control and Prevention sang pungsod, wala pa sang pat-od nga petsa kun tubtob san-o magalawig ang pagsuspende sang Vaccination gamit ang Johnson & Johnson COVID-19 vaccine.
Suno kay Bombo International Correspondent Rufino ‘Pinoy Gonzales’ direkta sa Texas, isa ini sa pinakadako nga pagpanghangkat sa mga dalagko nga retail pharmacies nga nagahulat kuntani sang kapin two-thirds nga supply sang amo nga bakuna sa sini nga semana.
Ginpahayag ni Gonzales nga apisar sini, ang single-dose Johnson & Johnson COVID-19 vaccine ang mas ginapili sang kadam-an sa ila pungsod kun ipaanggid sa mga vaccines nga ginmanufacture sang Pfizer kag Moderna.
Masobra katunga naman sa populasyon sang mga senior citizen sa nasambit nga pungsod ang nabakunahan na gamit ang Johnson & Johnson COVID-19 vaccine.
Sa subong suno kay Gonzales, magapangatubang na naman ang Texas sang vaccine hesitancy sang mga tawo sa diin posible nga madamo na ang nagakahangawa nga magpabakuna.
Nahibaluan nga santo sa Texas Department of State Health Services, kapin 500,000 ka doses sang Johnson & Johnson vaccine ang gin-administer sang Texas.
Kapin 7 million ka-tawo naman sa Estados Unidos ang nabakunahan na batok sa COVID-19 gamit ang bakuna nga himo sang Johnson & Johnson.
