Liwat nga magapadala ang Punong Barangay sang Q. Abeto, Mandurriao, Iloilo City sang sulat sa PLDT Telecommunications Company may kaangtanan sa naga-awas nga tubig nga halin sa ila nga manhole.
Sa interview sang Bombo Radyo kay Punong Barangay Ramon Amoroso, iya ginpahayag nga nakaayo na sang tinalikdan nga bulan ang iya ginareklamo nga manhole sang kompaniya sa diin naga-awas ang tubig apang sa subong, liwat naman ini nga natabo kag indi isa kundi duha na ka mga manhole ang ginaguwaan sang tubig.
Suno kay Amoroso, masinaw kag wala sang baho ang tubig nga nagaawas.
Dugang pa sang punong barangay, kuntani ipalab-ot man sang kompaniya ang problema sa pag-awas sang tubig sa kun sin-o man ang nagasupply sa ila.
