ILOILO CITY – Ginahulat na lang sang legal counsel sang kontrobersyal nga empleyado sang Iloilo City Hall nga si Joe Mari Esteral ang kopya sang dismissal order nga ginapahayag 2019 pa gin-isyu ni Iloilo City Mayor Jerry Treñas apang tubtob subong wala nabaton sang kampo sang natungdan.
Matandaan nga Nobyembre 2019 pa sang ginpauntat sa pagreport sa trabaho si Esteral bilang Book Binder II sang City Civil Registrar’s Office bangud sang ginapahayag nga gross insubordination.
Sa interview sang Bombo Radyo kay Atty. Hernando Galvez, iya ginpahayag nga samtang wala pa nagasabat si Treñas sa iya mga sulat kaangot sa desisyon sini sa kaso sang iya kliyente nga si Esteral, indi sila mag-untat sa pagpadala sang kasulatan sa alkalde.
Suno kay Galvez, nagapati siya nga indi dismissal order kundi ‘undated document’ lang ang ginpagwa sang 2019 nga gin-aprubahan man sang alkalde, ni City Legal Officer Atty. Edgardo Gil, kag ginpirmahan ni Legal Officer III Atty. Fhaymore Gascon.
Kun mapamatud-an sa ulihi suno kay Galvez nga wala matuod sang dismissal order, pat-od nga may salabton ang alkalde kag lain man ang salabton sang iban nga department heads nga amo ang nagmandu sa pagpauntat sa trabaho ni Esteral.
