Nadugangan sang 19 ang COVID-19 postive sa Daewoo Engineering & Construction Company sa Barangay Agcalaga, Calinog, Iloilo.
Matandaan nga ginsuspende ang operasyon sang amo nga construction company umpisa sang Abril 15 tubob Abril 28 sa diin masobra 1,000 ang ginpaidalom sa swab test bangud sang close contact sa mga pasyente.
Sa interview sang Bombo Radyo kay Calinog, Iloilo Mayor Francisco Calvo, iya ginpahayag nga ini ang dugang nga positive cases ang resulta sang 74 nga ginpaidalom sa swab test nga close contact sang Korean National nga amo ang index case nga nagpositibo sang Abril 13.
Suno kay Calvo, bangud sa pagtimbuok sang kaso sa ila banwa, gindugangan niya ang iya executive order No. 35 sa diin las 6:00 sang gab-i na ang curfew kag siraduhan ang tanan nga establismento komersyal kada Dominggo.
Sirado man ang tanan nga entry points sa Barangay Alibunan kag Barangay Pequeño padulong sa opisina sang construction company sa Barangay Agcalaga.
Sa subong, nagdangat na sa 72 ang bug-os nga kaso sang COVID-19 sa banwa sang Calinog, Iloilo.
