Nagnubo ang kaso sang COVID-19 kun ipanggid sang nagligad nga bulan sang Marso sa syudad sang Iloilo.
Sa interview sang Bombo Radyo kay Mr. Jeck Conlu, spokesperson sang COVID-19 Team sang Iloilo City Government, iya ginpahayag nga ginabanta 30 ka porsyento ang pagnubo sang mga kaso sang COVID-19 sa subong nga bulan sang Abril sa diin lunsay single digit number nalang ang nagadugang nga numero kada adlaw.
Suno kay Conlu, bangud man ini sa asud-asud nga pagpapanaog sang executive order ni Iloilo City Mayor Jerry Treñas agud hugtan ang health protocol sa syudad sang Iloilo kag hugot nga gindumilian ang mga pagtililipon sa publiko ukon mass gathering.
Ginpahayag ni Conlu nga magluwas diri, padayon man ang pagpatuman nila sang istrikto nga curfew sa kada barangay sang syudad.
Apisar sini suno sa natungdan, wala man sila nagapakampante bangud posible nga magtimbuok liwat ang kaso sang COVID-19 kag padayon sa gihapon ang ila kampanya syudad sa pagpatuman sang minimum health protocols.
