Nagapanindugan si Presidente Rodrigo Duterte nga wala sa gihapon sang may matabo kun kadto-an niya ang mga Chinese vessels nga yara nahamtang sa West Philippine Sea.
Ini ang may kaangtanan sa nagapadayon nga tensyon sa tunga sang Pilipinas kag China bangud sa mga Chinese vessels nga yara nahamtang sa Julian Felipe Reef nga sakop sang exclusive economic zone sang Pilipinas.
Sa public briefing ni Presidente Duterte, nangin bukas ini sa topiko may kaangtanan sa West Philippine Sea kag ini ang labing una nga kahigayunan nga nagpaguwa siya sang pahayag tuhoy sa ginaagawan nga teritoryo.
Suno sa iya, ang isyu sa West Philippine Sea ang magapabilin nga mangin kwestyon tubtob sa ulihe ukon tubtob nga mabalik ini sa pungsod.
“Even if I go there and sail there and ask questions, walang mangyari…The issue of West Philippine Sea remains to be a question forever until such time we can take it back,” suno sa Presidente.
“There is no way that we can get back yung tinatawag nilang Philippine Sea without any bloodshed,” dugang pa niya.
Apang mabalik lamang ang teritoryo sa Pilipinas kun may yara sang pwersa nga gamiton.
Indi man mahapos pahayag sang presidente nga ma-gyera ang Estados Unidos batuk sa China ilabi na kun ang Pilipinas amo ang maga-umpisa sang away.
Ang problema sa West Philippine Sea suno kay Duterte ang nag-umpisa sa administrasyon ni anay president Benigno Aquino III.
Apang apisar wala sang may mahimo ang Pilipinas sa presensya sang China sa Exclusive Economic Zone, handa man ang presidente nga magbato sa nasambit nga pungsod sa tion nga mahibaluan niya nga nagakuha sang langis, mga nickel kag matahom nga mga bato ang China sa West Philippine Sea.
