Magapasar sang lima ka resolution si Iloilo 2nd District Board Member Jun Mondejar nga makabulig tapna sang vehicular accidents nga lapnagon subong sa probinsya sang Iloilo.
Matandaan nga kahapon, asud-asud ang nangin kaso sang aksidente sa dalanon sa diin patay and duha ka-tawo matapos nagbunggo ang motorsiklo sa isa ka truck sa Sitio Kalawidan, Brgy. Igcocolo, Guimbal, Iloilo.
Magluwas diri, patay man ang mag-asawa matapos nagbunggo ang 10-wheeler truck sa Sports Utility Vehicle (SUV) sa Barangay Amamaros, Pototan, Iloilo.
Sa interview sang Bombo Radyo kay Mondejar, Chairman sang Committee on public order and security sang Sangguniang Panlalawigan, iya ginpahayag nga ang lima ka resolution nga ila ginaduso amo ang masunod:
- Deputization sang tagduha ka police personnel sa tagsa ka component unit ukon banwa sang probinsya sang Iloilo;
- Pag-edukar kag paglunsyar sang mga seminar sa tanan nga driver sang firetruck kag ambulansya lakip na ang mga driver sa kada banwa sang Probinsya sang Iloilo natuhoy sa rules and regulations sa mga dalanon;
- Pagmando sa tanan nga negosyo ukon establisemento komersyal nga nagabaligya sang tanan nga sahi sang transportation vehicle nga baligyaan lamang ang mga driver nga may yara sang driver’s license;
- Pagrequire sa tanan nga district hospitals lakip na sa Western Visayas Medical Center nga irekord sang kompleto kag tipunon sang maayo ang tanan nga trauma cases sang mga pasyente; kag
- Pagpatuman sa pamunuan sang Iloilo Police Provincial Office ang pagpatigayon sang checkpoints sa tanan nga strategic locations sa probinsya sang Iloilo
Hugot ang pagpati ni Mondejar nga sa tion nga mapasar ang mga nasambit nga resolution, posible nga mauntat na ang kaso sang mga vehicular accident sa probinsya sang Iloilo.
