Ginhilway na ang driver sang truck nga nakabunggo sa isa ka motorsiklo sa Sitio Kalawidan, Brgy. Igcocolo, Guimbal, Iloilo.
Ang mga biktima amo ang driver sang motorsiklo nga si Anthony Alexander ,18 , Grade -12 student, residente sang Nahapay, Guimbal, Iloilo kag angkas nga si Kyle Dela Piedra, 18, senior high school student, residente sang Tagpuan, Tubungan, Iloilo.
Ang driver naman sang truck amo si Rogelio Garganza Jr., 51, residente sang Brgy. Igcocolo, Guimbal, Iloilo.
Sa interview sang Bombo Radyo kay PLt. Nelson Caro, hepe sang Guimbal Municipal Police Station, iya ginpahayag nga sang nag-lapse na ang 18 ka-oras nga reglementary period ni Garganza, ginpapuli na lamang ini bangud wala man nagpasaka sang kaso ang pamilya sang mga biktima.
Suno kay Caro, wala pa man sang opisyal nga settlement sa tunga sang driver sang truck kag pamilya sang mga biktima.
Ginpahayag sang hepe nga apisar sini, posible man sa gihapon pasakaan sang kaso nga Reckless Imprudence Resulting to Homicide si Garganza sa tion nga magbag-o ang pinsar sang pamilya sang mga biktima.
Apang sa subong suno sa natungdan, wala pa man sang plano nga magpasaka sang kaso ang pamilya nanday Alexander kag Piedra nga napatay sa natabo nga aksidente.
