ILOILO CITY – Maga-isyu sang isa ka tuig nga Provisional Authority ang chairman sang Committee on Transportation sa Iloilo City Council para sa mga tricycle drivers nga wala sang prangkisa.
Sa interview sang Bombo Radyo kay Iloilo City Councilor Atty. Rommel Duron, iya ginpahayag nga tuig 2017 pa ginmando sang Department of Transportation ang paghitso sang Local Public Transport Route Plan may kaangtanan sa issuance sang prangkisa para sa mga tricycle drivers.
Suno kay Duron, pagpungko niya bilang chairman sang Committee on Transportation sa konseho sang 2019, gintinguhaan niya gilayon nga mahatagan sang igtalupangod nga mapasar ang Local Public Transport Route Plan agud makapa-renew sang prangkisa ang mga trycycle drivers sa syudad sang Iloilo.
Ginpahayag ni Duron nga bangud sa COVID-19 pandemic, wala pa sa gihapon nila makompleto ang tanan nga data kag rekisitos nga kinahanglan agud matapos na ang Local Public Transport Route Plan.
Bilang remedyo, ginpakamaayo sang natungdan nga hatagan anay sang 1 year Provisional Authority ang mga drivers sang traysikol sa diin nagsaka na sa 80 porsyento ang wala sa gihapon sang prangkisa.
Temporaryo lamang ini suno kay Duron samtang ginahulat pa ang approval sang Local Public Transport Route Plan natuhoy sa new application sang mga driver sang traysikol kag agud makabyahe sila nga rehistrado kag may insurance pinaagi sa Provisional Authority.
Gin-ako man sang natungdan nga indi mahapos ang pagbalay sang nasambit nga route plan sa diin nasaad ang tanan nga data kag route plan sang tricycle drivers bangud tuman ka damo sang kinahanglan nga requirements.
