Bentaha sa serbisyo kun may salakyan ang tagsa ka opisina sang Board Members sa Sangguniang Panlalawigan sa probinsya sang Iloilo.
Ini ang panindugan ni Iloilo 3rd District Board Member Matt Palabrica may kaangtanan sa kontrobersyal nga pagbakal sang Iloilo Province sang pito ka mga salakyan.
Apat diri ang Sports Utility Vehicle (SUV) para sa mga board members sang first, third, and fourth districts kag opisina sang bise-gobernador, duha ka pickup trucks ang para sa mga board members sang second and fifth districts kag isa ka van para sa opisina sang ex-officio member.
Sa interview sang Bombo Radyo kay Board Member Palabrica, iya ginpahayag nga Hunyo 30, 2019 pa ang proposal sang probinsya agud magbakal sang salakyan kag ang budget ang ginkuha sa nabilin nga pondo sa termino ni former Iloilo Governor Arthur Defensor Sr.
Suno kay Palabrica, mabudlay sa ila sa tirsier distrito nga magbyahe sa mga bukid kag banwa nga wala sila sang kaugalingon nga transportation vehicle.
Ginpahayag ni Palabrica nga indi man bastante ang ila Representation Allowance and Transportation allowance (RATA) sa sulod sang isa ka bulan.
Sa isyu naman may kaangtanan sa pagbakal sang mga salakyan sang probinsya sa tunga sang COVID-19 pandemic, ginpahayag ni Palabrica nga kun ano ang mangin statement kag sentimyento sang Sangguniang Panlalawigan, nakahanda man siya magsuporta.
