Madamo sang mga pagpanghangkat nga gin-atubang si Atty. Helen Catalbas samtang nagapungko siya sadto bilang regional director sang Department of Tourism Region VI.
Sa interview sang Bombo Radyo kay Catalbas, nga nangin isa man ka malawig nga manunudlo sang liberal arts, administrative law, kag public administration sa University of San Agustin bag-o nangin regional director sang DOT, iya ginpahayag nga madamo man siya sang mga pagtilaw nga gin-atubang sa iya pagpangalagad sa ahensya lakip na ang mga ginapangatubang nga mga kaso.
Suno kay Catalbas, isa sa iya mga katungdanan bilang regional director sang nasambit nga ahensya amo ang paghatag sang Certificate of Accreditation nga amo ang lyabe sang isa ka establisemento komersyal nga magbukas kag mag-operate sang negosyo sa Western Visayas.
Magluwas diri, may poder man si Catalbas nga magpasira sang mga negosyo sa tion nga may mando nagikan sa National level sang DOT.
Ginpahayag ni Catalbas nga sang may ginpasirado siya nga negosyo, didto kag ginpasakaan siya sang kaso nga ginderitso sa korte.
Ginasukot man siya sang P100,000 nga danyos sa kada adlaw nga sirado ang amo nga establisemento komersyal.
Bangud wala gin-obserbar ang doctrine of exhaustion ukon ang administrative remedies antes magderetso sa korte kag magfile sang kaso ang tagreklamo, ginbasura man suno kay Catalbas ang kaso nga ginpasaka sa ila.
Gin-athag sang natungdan nga kun nag-apelar sang motion to recommendation anay ang tagreklamo sa regional level kag national level sang ila ahensya, antes ini nagpasaka sang kaso, mahimo nga nahitso pa ang reklamo.
Sa tion nga wala masunod ang doctrine of exhaustion suno kay Catalbas, posible nga mabasura kag madismiss ang isa ka kaso nga gindiritso sa korte bangud sa kakulang sang ’cause of action’.
