Bilang iloy sang Barangay Magsaysay, La Paz Iloilo City, nagpanguna si Punong Barangay Gina Barrientos sa pagpabakuna sa COVID-19.
Sa interview sang Bombo Radyo kay Punong Barangay Barrientos, iya ginpahayag nga nabakunahan na siya sang Sinovac brand sang COVID-19.
Suno kay Barrientos, isa ini sa pamaagi agud mangin ehemplo siya kag maka-engganyo sang iya mga pumuluyo nga nagapangduha-duha nga magpabakuna sa COVID-19.
Ginpahayag ni Barrientos nga wala siya nagauntat kaupod ang pila ka mga barangy official sa paglab-ot sa mga residente sang ila lugar agud nga maparehistro para sa COVID-19 Vaccination.
Samtang, pila man ka senior citizens kag person with disability sa ila barangay suno kay Barrientos ang nakaschedule para sa COVID-19 vaccination.
Nagpanawagan man ang natungdan sa iya mga pumuluyo nga dulaon ang kahangawa sa pagpabakuna, bangud kaangay niya nga vaccinated na, wala sang side effect ang bakuna kag sa baylo, dako ang pa ang mabulig sini agud malikawan ang pag-angkon sa COVID-19.
