Ginpaidalom na sa ikatatlo nga state of emergency ang Japan.
Ini ang kasunod sang pagtimbuok sang kaso sang COVID-19 tuga man sang bag-o nga variant sang amo nga virus.
Suno kay Bombo International Correspondent Josel Palma, direkta sa Japan, ang state of emergency ang nagasakop sa Tokyo kag mga western metropolis sang Osaka, Kyoto kag Hyogo.
Ang 17-day emergency ang nag-umpisa kahapon, Abril 25 kag magalawig tubtob sa Mayo 11.
Pahayag ni Palma sa sulod sang 17 ka-adlaw, siraduhan ang department stores, malls, theme parks, bars kag restaurants nga nagaserbe sang makahulubog nga ilimnon, lakip na ang theaters kag museums.
Ang mga restaurant naman nga wala nagaserbe sang alcohol kag ang mga public transportation vehicle ang ginmanduan nga magsirado sang timprano.
Ipabilin naman nga bukas ang mga eskwelahan kag mga grocery store apang para sa mga unibersidad, ipatigayon ang online classes.
Ginhingyo man sang gobyerno sa mga tawo nga indi maglagaw, pakamaayuhon nga magwork from home kag istrikto nga sundon ang tanan nga health protocol.
Samtang, suno kay Palma, apisar sang nagasaka nga kaso sang COVID-19 sa Japan, determinado ang gobyerno kag ang Tokyo Olympic Organizers nga dayunon sa July 23 tubtob sa August 8 ang olympic games.
Bangud sini suno sa natungdan, madamo man sang mga tawo ang nagapanawagan nga kuntani ipostpone nalang ang Olympic games.
